S'hät Schnee, juhee!

Won i hüt morge uufschtaa
und d Fänschterläde uufschlaa,
bin ich vor Fröid fascht usegheit:
Es hät z Nacht zümpftig gschneit.

S hät Schnee, juhee und s git no mee. S isch ales wiiss veruss.
Ich legg mi aa zum Usegaa und bliib de ganz Taag duss.

D Wäägli müend zeerscht frei sii, de Schnee chunt uf en Berg.
Deet grab i dänn e Hütte drii, und schpile Winterzwerg.

Ich boue mir en Schneemaa, und dee brucht tänk e Frau.
Paar Chinde sötteds au haa, en Hund ja villicht au.

Dänn loos zur Schlittelwise, mir stampfed unenuuf.
Dänn obenabe frääse, s verschlaat eim fascht de Schnuuf.

Jez han i langsam Hunger, und alls isch zimli nass.
Schnäll hei go ässe, umzie, und wiiter gaat dä Spass.

Liedtext von Andrew Bond